Bainvgnüdas e bainvgnüts sün nossa pagina web.
Flot cha vo eschat rivats quia. Propcha per vo vaina fat quist sectur, schi, per dar valur a nos tuns e suns, a nossa melodia.
Eu n’ha adüna fat jent teater per rumantsch. Mia lingua materna sbuorfla our da mai co ingün’otra. E plan a plan imprenda eir Nikolas a far stincals per rumantsch. I vegn, i vegn.
Quia as giavüschaina bun divertimaint per navigiar e scuvrir nossas offertas. E bain cler cha no proponin tuot eir per rumantsch.
Giodai e tuot il bun…
Il spectacul
La maschina da furtüna da Sar Widerstand
Sar Widerstand, ün scienzà instancabel e caotic, ha l’idea geniala da construir üna maschina chi fa gnir cuntaint. La maschina da furtüna!
Es quai sia schanza per survgnir il premi Nobel?
Sia assistenta Betta sustegna daspö ons vivamaing sias invenziuns.
Plan a plan cumparan obstaculs e resistenzas. Co cumanzar? Che porta furtüna? E che far lura culla furtüna? Lur proget vegn adüna plü disfurtünà.
Tuots duos as perdan vieplü in lur dramas fin chi piglian lur aigna furtüna in man.
Ün spectacul umoristic in tschercha da furtüna per uffants da 5 fin 99 ons per rumantsch e tudais-ch.
